ამერიკული საფონდო ბირჟა რეკორდული აღმასვლის ტენდენციას დაუბრუნდა. გეოპოლიტიკური არასტაბილურობის და სავაჭრო საკითხებში გაურკვევლობის მაღალი დონის მიუხედავად, Nasdaq-ის და S&P 500-ის საფონდო ინდექსების მიმართ ინვესტორების განწყობა მნიშვნელოვნად გაუმჯობესებულია.
ბოლო პერიოდში განსაკუთრებით გამორჩეული შედეგი ტექნოლოგიურ სექტორში წარმოდგენილ კომპანიებს აქვთ, მათ შორის ლიდერის როლში კი Nvidia-ს ვხედავთ, რომლის საბაზრო შეფასება რეკორდულ $3.85 ტრილიონამდე გაიზარდა, რაც მას ამჟამად პლანეტის უმსხვილეს კომპანიად აქცევს.
საფონდო ბირჟის აღმასვლა რიგი ფაქტორებითაა განპირობებული, მათ შორის ერთ-ერთი ახლო აღმოსავლეთის რეგიონში გეოპოლიტიკური რისკების შემცირებაა. თავად ეს მოვლენა ინვესტორებს აფიქრებინებს, რომ ისრაელი-ირანის კონფლიქტი დამატებით არ გამწვავდება და ნავთობის რეკორდულ გაძვირებასთან საქმე არ გვექნება.
ამასთან, თეთრი სახლის მხრიდან გავრცელდა ცნობები იმასთან დაკავშირებით, რომ ამერიკის შეერთებული შტატები და ჩინეთი სავაჭრო შეთანხმებას აფორმებენ, რაც ქვეყნებს შორის ვაჭრობის გამარტივებას, ტარიფების შემცირებას, სანქციების შემსუბუქებას და ურთიერთობების ნორმალიზებას გულისხმობს. ბუნებრივია, ამ სიახლეს ინვესტორები განსაკუთრებით პოზიტიურად აიღებენ, რადგან აშშ და ჩინეთი მსოფლიოს უდიდესი სახელმწიფოები არიან, მათ შეთანხმებაზე კი ბევრი რამ არის დამოკიდებული.
ასევე პოზიტიური მოლოდინებია სხვა სახელმწიფოებთან მიმართებითაც, რადგან თუკი ტრამპის ადმინისტრაცია ჩინეთის მთავრობას მოურიგდა, მაშინ ლოგიკური იქნება, რომ ის საერთო ენის გამონახვას ევროპულ, სამხრეთ ამერიკულ, აფრიკულ და აზიურ სახელმწიფოებთანაც შეძლებს.
მორიგი მნიშვნელოვანი ფაქტორი მონეტარულ პოლიტიკასთან არის დაკავშირებული. ბაზრის მოთამაშეებს უკვე აქვთ მოლოდინი, რომ აშშ-ის ფედერალური რეზერვი რეფინანსირების განაკვეთს მოსალოდნელზე სწრაფად შეამცირებს, რაც საფონდო ბირჟას ზრდისათვის დამატებით სტიმულს მისცემს.
მთავარ პრობლემას რაც შეეხება, რომელიც აშშ-ის $37-ტრილიონიან ვალს უკავშირდება, ამ მიმართულებით შიშები გაქარწყლებულია, რადგან ყველასათვის გასაგებია, რომ ფედერალურ მთავრობას დეფოლტი არასოდეს განუცდია და ის არც მომავალში აპირებს ამის გაკეთებას, რადგან შეუძლებელია FED-ს დოლარი დაუმთავრდეს, ვინაიდან ის თვითონაა მისი გამომშვები.
საერთო ჯამში, ვხედავთ, რომ ინვესტორების განწყობა საკმაოდ პოზიტიურია, გეოპოლიტიკური რისკები შემცირებულია და მაკროეკონომიკური მიმართულებით პროგნოზები გაუმჯობესებულია, ბაზრის ასეთ სენტიმენტს კი საფონდო ბირჟის რეკორდულ ზრდამდე მივყავართ, რაც ლოგიკური და მოსალოდნელია. 6000-მდე ამერიკული კომპანიით ვაჭრობა მობილბანკშია შესაძლებელი.